..........................الضريبة.................................
قالوا أمان يابلد
أنا قلت بضريبة
قالوا حدانا ولد
قومي ارقصي يانجيبة
كراماته مالها عد
روحي الحقي تحجيبة
حلال كل العقد
يفك اعتى مصيبة
معين لينا وسند
حبيب لكل حبيبة
تسمعه يبان أسد
تعامله تلاقي أميبة
قالوا زمان في المثل
فاجرة وعاملة أديبة
لايغرك الحسك
ولا مطوحة شريبة
وان جال لك محترف
هات له عيال لعيبة
خلي الببان مواربة
راح تنجدك تسريبة
يا رايد الحياة
على كل لحظة ضريبة
الأولى لولادتك
خروج لدنيا رحيبة
والتانية على أنفاسك
والتالتة على الزبيبة
والرابعة لبصايرك
والخامسة دقون وشبيبة
والسادسة للمسامع
والسابعة قواك العجيبة
والتامنة على الخطاوي
يا ابو الرجول دبيبة
والتاسعة للكلام
والعاشرة للزكيبة
والضحك ياواد يا رايق
والصمت عليه ضريبة
الحق يا ابو كرش بايت
نزل كرشك ببيبة
بيقولوا فيه ضرايب
على البطن اللي كتيبة
ادعي ربك يصيبك
تلقي روحك كئيبة
أو خلي امك تقولك
يارب تشوف مصيبة
علطول تصبح رشيق
للنوم تصبح نهيبة
وانت يا ابو الطوال
قول طولي والله عيبة
أو اعمل فيها عبيط
لا تقول عظمة وهيبة
داري جمالك ياشابة
كوني وحشة وأريبة
أنا عارفك يانوال
مايهزك الضريبة
اسمع ياعبد العال
خلي حياتك رتيبة
ليقولوا انك عال
تبقى دارك زريبة
وانت يا اللي انت حامل
عليكي العين رقيبة
قولي دا حمل كاذب
جوزي دا كله طيبة
بينام من المغربية
أهبل ماعنده ريبة
عالم مليان ضرايب
ننام نصحى بضريبة
ضريبة على الأماني
ضريبة على الأغاني
وضريبة على الضريبة
عاوز تخوف ابنك
قولوا اوعى الضريبة
أو تهدد مراتك
قول والله شايف ضريبة
رايد تغيظ حماتك
ناديها وقول ضريبة
ياشيخنا وانت ساجد
والله اجابتك قريبة
ادعي وقول يارب
ارفع عنا الضريبة
يارايد الدجال
يعمل لوقف الحال
وفر عليك فلوسك
واكتب حروف ضريبة
وانا ماشي في التجوال
بغني واقول موال
قربت من التمثال
لقيت خطيب وخطيبة
عم بيقولوا في كلام
عمال على بطال
والوجد بيهم مال
فجأة وقام زلزال
ولقيت لمة رهيبة
يدوب بسأل سؤال
ايه غير الأحوال
صفعني بالعقال
كتفني وقال ضريبة
رحت اشتكي ياخال
وأقول أنا بطال
كلي يريد احلال
وشبابي بقى شيبة
رد عليا وقال
رايد هروب ياهلال
لو هتعد الرمال
أو هتهد الجبال
تروح يمين شمال
هتدفع الضريبة
بقلمي | محمود عبد الخالق عطيه المحامي
ليست هناك تعليقات:
إرسال تعليق