*** توت توت ***
تعليقا على قصيدة توت توت للرائع الدكتور الشاعر صلاح عبدالله
توت توت توت توت
الحرية و لا القوت
لأ يا صديقى الحرية
لو هنجوع او حتى نموت
الحرية يا صاحبى بداية
شايلة فى ايدها الف نهاية
فيهم مليون حكمة و اية
اما الجوع حالة و بتفوت
بالحرية انا هاخد حقى
و اهجر جحرى و اقفل شقى
و اختار اللى يكون متنقى
و ابقى الديك ما ابقاش كتكوت
توت توت توت توت
الحرية و لا القوت
بالحرية هاكون انا سيدى
و اخلق بكره الجاى بايدى
و احفظ دمى جوا وريدى
و انسى الفلكة و الشلوت
الحرية و لا القوت
الحرية طريق و منور
مفتوح للاعمى و للاعور
حلو اوى اكتر ما اتصور
ما بيفرضش عليا سكوت
اختار فيه سكتى على كيفى
يبقى العدل سلاحى و سيفى
حتى ان توهت و زاد تخريفى
مش هيكون الحل الموت
توت توت توت توت
الحرية و لا القوت
الحرية يا صاحبى .. الاخر
مش هاتزحزح و لا هاتاخر
و لا هامسك فى ايديا مباخر
و لا هاتمسح فى الهلفوت
و الحرية و اكون خدامها
و ابقى و راها و اكون ادامها
فرسة اصيلة الحق لجامها
ترفس فى المتعاص و تشوط
الحرية كنز حفيدى
طبق الكحك الحلو ف عيدى
هتكون طول العمر نشيدى
حتى و لو عريان سلبوت
توت توت توت توت
الحرية ... بلاه القوت
ليست هناك تعليقات:
إرسال تعليق