لو كان حبك خيانه
هيبقي آنا
من غير كلام
الخاين الاول
كل اللي ركبو حيطانك
قفلو بيبانك
على إديه ولا اتحول
طول عمري منبوذ وصابر
ما ملكت غير روحي
وغير قلبي
وغير قلمي
أنا الشاعر
كلامي واضح
لكن دايما بيتأول
طول عمري راضي
ومش طمعان
أكون لا رئيس ولا قاضي
لإني بجد مش فاضي
طول عمري اسند فى ضهرك
مربي أنا مهرك
دافع أنا مهرك
من لقمتي ودمي
واللي يمد ايديه على هواكي
على سترك
على شمسك
على قمرك
اموت فداكي
ولا أشوف ف يوم قهرك
واما الظلام بيزيد
والضحكة بتطاطي
والنسمة تتحجر
أقوم من عز موتي وأرجعلك
تتطمني وتمدي إيدك
بحفنة مية من نهرك
أرجع شباب
واقف على الباب
فى ليلك وفى صبحك
واقف على الباب
فى حزنك وفى فرحك
واقف على الباب
فى نومك وفى سهرك
طب عارفه نفسي ف إيه ؟!
أدخل ف يوم قصرك
أنا اللي دايما أقول
موال على الأرغول
كل إللى حب ينول
كل اللي حب يطول
يحصل ما يحصل يا نيل
وأنت تجيب مية
نروي الشجر والنخيل
للنص فى المية
واحنا السمك الصغير
واحنا المعدية
معرفش ليه راضين
طول عمرنا ف الطين
والسجن و الزنازين
الشهدا راحو فين ؟!
أكيد ف يوم راجعين
جايبين بذور العدل
وجناين المساكين
جايين يحاسبو الندل
وينصفو المظاليم
ليست هناك تعليقات:
إرسال تعليق