---(إهداء إلى أهالى شهداء الوطن)
-------دينى دين رحمه وسلام........
بسم الله الرحمن الرحيم
بالرحمة يبدأ دينا احنا يا مسلمين
لكن أنت مين
من اى دين
ومين قالك تعمل كده
ومين معاك وفهمك دينك كده
ما تقولى مين
وبأى ذنب العسكرى يموت كده
يا ابو فكر معدوم الضمير
هو ابن مين
دا أخوك واخويا
يمكن يكون كان معاك فى المدرسه
يمكن لعبتوا ف يوم سوا
لما كنتوا صغيرين
دور ف ألبوم الصور شوف كده
شوف القديم
يمكن يكونله صوره عندك من سنين
وانتوا سوا بس انت ناسى
ويمكن مره كال معاك
واللقمه قسمتوها سوا
وبرده ناسى
واللا انت ما عشتش هنا
أكيد ما انتش مننا
هو انت مين ودينك دا اى دين
دا دينا رحمه لو قلبك مره حسها
ما كنت راح تعمل كده
ايه بس ذنب العسكرى يموت كده
هو ابن مين
دا لا ابن شارون ولا رابين
أنا دينى دين رحمه وسلام
لكن انت مين ودينك دا اى دين
حرمت أم من ابنها
كان نفسها تشوفه ليله دخلته
وتشيله ابنه تهدهده
وتحكيله قصة جدته
شوهتوا دينا بفعلكم
خليتوا العالم ذلنا وذلكم
مش دينا ده.....ولا اى دين
شوهتوا دينا بفعلكم
بفعلكم راح تنقسم يوم أرضنا
كردي ودرذى سنه وشيعه
شمال جنوب
نفسه يقسمها من سنين عدونا
طول عمره مترصدلنا عشان
يقسم ارضنا
وبيدعى إنه بيحمى أرضنا
وبيحمينا من عنفنا ومن بعضنا
وأن دينا ما بحترمش اى دين
رغم أن هم يعلموا علم اليقين
أن دينا مش كده
ولا عمره كان فى يوم كده
و رغم هما متأكدين أن الإسلام
دين المحبه والسلام
بس اللى عايزه فينا ألتقاه
ونال مناه
لكن انت مين
لربنا راح اشتكيك حرام عليك
قولى انت مين
فهمنى يمكن أكون معاك
تعالى كده
شوف شكل أبوه هو وأمه يوم دفنته
يمكن ترق وقلبك يحس
وتبقى واحد زيينا
وتحكيلى ليه كده
فهمنى رغم أنى عارف ولدينى فاهم
وأعلم كمان علم اليقين
أن دينا مش كده
دينا قال اللى يقتل نفس واحده
قتل الناس اجمعين
ونبينا قال شدوا ازر بعضكم يا مسلمين
كالبنيان مع بعضكم كونوا سوا متجمعين
حتى لو عاش وسطنا واحد دينه اى دين
يعيش معانا سالم أمين
دا أفهمه عن دينى
واعلمه علم اليقين
لكن أنت مين
لو كنت فاهم دا الجهاد
أفتح من تانى الكتاب
واقرا كلام ربنا تانى من جديد
وعيد تانى صيغه حياتك
وأخرج من جوا الجحور
راح تلقى نور ربك غفور
يمكن يقبل تانى منك
بعد ما قتلت الامل
وقتلت ابن كان قلب أبوه
ولما راح
اخد معاه روح ابوه
انت مين وبأى حق عمال بتقتل وبأى دين
عايز تعرف ايه الجهاد
اللى كان بيحمى أرضه يوم ما مات
هو دا يبقى الشهيد
اقرا الكتاب تانى من جديد
وفكر بعقلك لو كان لسه له وجود
وسيبك م الفكر العبيط
عايش فى ضلمه
زى الفران جوا الجحور
وقبرك لسه هيبقى ضلمه
والا خره نار
دنيا وآخره ما شفت نور
عارف انت قتلت مين
دا ابن راجل م الطيبين
ولاد بلدنا
جاله الخبر
وهو واقف قلب أرضه يروى زرعه
مستنى يكبر لاجل يحصد
عشان يبيع زرعته
يجهز لابنه شقته
لاجل الجواز أصل خلاص
باقى يومين وابنه يخلص خدمته
أصله خلاص هيجوزه
نفسه يشوف يوم زفته
مستنى اليوم دا من سنين
و عروسته بتعد الثواني وتقول خلاص باقى يومين
وأنا وحبيبي نكون زوجين متجمعين
تعبنا يا أمه من سنين
عماله أجمع فى العزال م الشمال وم اليمين
خلاص بقى هنعيش يومين أنا وحبيبى
اصل بحبه دا واد رجوله وقلبه طيب
وجوا منه خير كتير
مش هى يا امه عشره سنين
ويا بعض متربيين
حتى أمه بتحبنى وبتعتبرنى بنتها
وبيدعى ليا زى ما بتدعى بردك لها
وطيبه ما بتسبشى سجاده الصلا
واديها صيامه من يومين
لكن أنت مين
لربنا راح اشتكيك حرام عليك
والله حرام
يا أبو قلب طين
ذنبه ايه العسكرى يموت كده
لو كنت بتعادى النظام
هو موت العسكرى هيشيل نظام
وللا العسكرى بايده ياخد قرار
واللا القتل كان فى يوم غير نظام
يا أبو قلب معدوم الضمير
هو ابن مين
ابن الست الطيبه ضهرها محنى من سنين
اول ما تعرف انه جاى تملك الدنيا وما فيها
وتطول السما بايديها
مش هو أول فرحه ليها
وتفضل تحضر فرشته
حبيبى جاى ابنى جاى
وكل ما تلم الغسيل
تفضل تشم ف هدمته
وتقول اصل ريحته فيها
وتقول كمان أن ريحه مسك ماليها
رغم عمرى ما حطيت مسك عليها
ما كانتش عارفه أن دى ريحة الشهيد
والمره دى قالت خلاص هرمى هدومه
ونجيب جديد
واحنا بنجيب بدلته وفستان عروسته
دا يومها هيبقى عندى عيد
جه الخبر لابوه ف غيطه
وقع فى طين
ولما فاق و رجعله عقله ورجعله دينه
صرخ بأعلى صوته ويقينه
وايده شايله من أرضها ومن أرضه طينه
الله أكبر الله أكبر
فداكى ابنى مات شهيد
فين انت منه شوف كده
الفرق ايه بينك وبينه
رغم بتزعم ان دينك هو دينه
عشت دنيتك بين الجحور
واخرتك ضمه قبور ضلمه قبور
لكن هوا مات ومات شهيد
وقبره نور
لكن أنت مين ودينك دا اى دين
ذنبه ايه العسكرى يموت كده
دا لما جه الخبر لابوه
رغم ان كان قلب أبوه
لكن أبوه كان كل همه
ازاى يوصل لأمه الخبر
دى برده أمه
راح تنقهر او تنتحر
دا ليل نهار نايمه ف حضن هدمته
وبتعد أنفاس الهوا ليوم دخلته
طب أعمل ايه هايجينى قلب أقولها
شوف الفرق بينك وبينه
وأنت بتقول ان دينك هو دينه
هو خايف يقولها
خايف ليكسر قلبها
لكن أنت النفس قتلتها
من غير شعور
هو انت مين ودينك دا اى دين
تعالى كده شوف دفنته
فيها اد ايه
دا مصر كلها زعلت عليه
حتى أمه اللى أبوه خايف عليها
زغردت ف مشهده كأن هى زفته
وقالت دا يوم دخلته الكفن هو بدلته
والحور أزواجه وعزوته
راجع انت نفسك
راجعها تانى من جديد
لو كنت فاكر دا الجهاد
اقرا من تانى الكتاب
واعرف مين هوا الشهيد(وائل عمر)
ليست هناك تعليقات:
إرسال تعليق