رانيه رنوش تكتب (( يا عمر الربيع ))

ياعمر الربيع!!

ياعمر الربيع الداير

 فوق قمار هاك الدار

ترسم قصايد غزل

 وتكتب ع حيطان القلب أشعار

تلملم حكايات منسية وتقطف

من رمش الحلا تذكار..

ولما يازمان تعود حامل كتابك...

وبقايا صور...

 وشوية حكي وأسرار !!

دخلك احملني بكفك الدافي

وخبيني على صدرك هالحنون

شم العطر واتنفس ع شلحات

الحلم ريحة أرض وقمح وغار

ولملم غصان العشق زيتون

أنا طفلتك المدللة

المليان صدرها عطرك

وريحة اوراقك !!

وفنجانك المزين بتل قمااار...

ارشفني متل مواسم الحنين

وقطف عن خد الزهر حبك

يلي لوح تلاوين ومواويل

يا غصن تاكي على بيدر حنين

ازرعني ياسمينة وعرشها على

 جبال شوقك حكاية وفى

ملونة بليلك نيسان الحلو

ياقمر حزيران

 يا غناني

الحلااا والعمر والسنين

يا رسمي الخالد ع ملامح

العشق الرزين..

رانيه رنوش//سورية