بقلم عادل عبد الغنى عبد الحميد
رساله إلى امى
باعتب عليكي يا أمى اسمعينى
ازاى بتبكى وانا بالجنه شهيد
ليه الدموع فى عيونك فهمينى
والليله ليله فرحتي الليله عيد
زغرطى زغروطه حلوه فرحينى
مهر الحوريه اتدفع اليوم اكيد
حلوه الشهاده يا أمى صدقينى
حلوة قوى بدمى ابنك سعيد
على جسمى علم بلادى الجميل
على قلبى رصاصه من حديد
كان حلمك تشوفينى عريس
طيب ما أنا عريس وكمان جديد
عندى الف زفه وألف دعوه
بس فوق عند رب حميد مجيد
ليه تزعلى وانا بايدى حنتى
ليه تغضبى وانا برحمه رب العبيد
كل الحكاية بحب بلدى واهلى
كل الحكايه أن بحارب شيطان مريد
يرضيكى يقولو على ابنك جبان
والله ما يحصل ولو يزيدو نزيد
ان مات مننا واحد يطل
يخرج من دمى مليون وليد
وازاى أبص بعينك يا غالية
وكلاب الغدر عايزه تنحر الوريد
وازاى أقابل ربنا واستغفره
ويقلب بلدى ارهاب زى الصديد
ده انا فدى اخوانى واهلى
حتى لو من عمرى خلص الرصيد
ان جندى مصرى خيرة الجند
ان ابن الجبل واجمد منه وشديد
صعبان عليكي فراقى معلش
صبرك يا امى ربك كريم رشيد
لملمى تراب بلدى على كفنى
شايفك يا غالية لكن من بعيد
اموت الف مرة و مرة
ولا أن اخويا يبقى بالاوطان شريد
اتحنى من دمى وافرحى
وجوه قلبى طبطبى بكل ايد
شايفه يا امى ده مش جنازه
ده موكب ملك وده حلمه الوحيد
يحضن كفوف النور بالسما
والدم مسك وعنبر يا فرحى زيد
لو مت الف مرة حلوه الشهادة
عشان بلدى تعيش عمرى زهيد
حلوة ضحكتك يا ام البطل
وبكرة احلى بدمى احلى اكيد
تمت
بقلم عادل عبد الغنى عبد الحميد
ليست هناك تعليقات:
إرسال تعليق