هانت عشرتي
هانت عليه محبتي وهانت عليه العشرة
معدن دهب عشرتي.... وحبه كان قشرة
وف امتحان ازمتي جاب صفر من عشرة
حبيت وقلت خلاص يابا
د.الدنيا آسية وغلابة
وقلبي عمره مابص لفوق
ولا عشان ما إحنا غلابة
رسم طريق ومشيته معاه
اوله حبه وآخره هواه
ملك قلبي وملك الشوق
بدل غرامه أنا دقت اساه
حسيت بقلبي أنه في وادي
وكأنه ناوي علي بعادي
فضلت عايم من غير طوق
وكان مصبرني عنادي
كان لازم أفهم من الأول
إن غرامه حيتحول
وقلبي يحزن اقول ما تروء
أصل العذاب مش حيطول
بدموعي خلصت مناديلي
عشمان وأقول أمتي يجيلي
حسيت بأني لازم أتوب
والاقي قلب بيدعيلي
قفلت علي قلبي الاحزان
مبقاش فيه للحب مكان
لاغروب ولا شروق يداويني
مبقتش حسه بأي أمان
طارق عطية....شعبي
